(មូស្គូ)៖ ក្រសួងការពារជាតិរុស្ស៊ី បានបញ្ជាក់នៅថ្ងៃព្រហស្បតិ៍នេះថា ឧត្តមសេនីយ៍ Mikhail Gudkov ដែលជាអនុប្រធានកងទ័ពជើងទឹករបស់ខ្លួន ត្រូវបានសម្លាប់នៅក្នុងការប្រយុទ្ធមួយនៅតំបន់ Kursk ដែលជាប់ព្រំដែននឹងអ៊ុយក្រែន។ នេះបើយោងតាម ទីភ្នាក់ងារសារព័ត៌មាន Reuters នៅថ្ងៃទី៣ ខែកក្កដា ឆ្នាំ២០២៥។

របាយការណ៍ក្រៅផ្លូវការបានអះអាងថា មន្ត្រីជាន់ខ្ពស់រូបនេះ ត្រូវបានសម្លាប់ដោយការវាយប្រហារដោយមីស៊ីល HIMARS របស់អ៊ុយក្រែន។

សេចក្តីថ្លែងការណ៍ផ្លូវការរបស់រុស្ស៊ី បានត្រឹមតែបញ្ជាក់ថា លោក Gudkov បានស្លាប់កាលពីថ្ងៃពុធ <<ក្នុងអំឡុងពេលបំពេញការងារប្រយុទ្ធ>>។ ប៉ុន្តែ បណ្តាញ Telegram យោធារបស់រុស្ស៊ី និងអ៊ុយក្រែន បានរាយការណ៍ថា លោក Gudkov ត្រូវបានសម្លាប់ រួមជាមួយមន្ត្រីផ្សេងទៀត នៅក្នុងការវាយប្រហារដោយមីស៊ីល HIMARS របស់អ៊ុយក្រែនទៅលើទីបញ្ជាការមួយ។

គួរបញ្ជាក់ថា ការស្លាប់របស់លោក Gudkov អាយុ ៤២ឆ្នាំ ដែលទទួលបន្ទុកលើកងម៉ារីនរុស្ស៊ី គឺជាការបាត់បង់ដ៏ធំមួយ និងជាមន្ត្រីយោធាជាន់ខ្ពស់បំផុតម្នាក់ដែលត្រូវបានសម្លាប់ចាប់តាំងពីសង្គ្រាមពេញបន្ទុក បានចាប់ផ្តើមក្នុងឆ្នាំ ២០២២។ លោកទើបតែបានទទួលគ្រឿងឥស្សរិយយសយោធាថ្នាក់ខ្ពស់ ពីលោកប្រធានាធិបតី វ្ល៉ាឌីមៀ ពូទីន ដោយផ្ទាល់ កាលពីខែកុម្ភៈ។

ទោះជាយ៉ាងណា ភាគីអ៊ុយក្រែនមិនទាន់បានចេញសេចក្តីអត្ថាធិប្បាយភ្លាមៗអំពីការស្លាប់នេះទេ ប៉ុន្តែកន្លងមកធ្លាប់បានចោទប្រកាន់លោក Gudkov និងអ្នកក្រោមបង្គាប់របស់គាត់ ពីបទប្រព្រឹត្តឧក្រិដ្ឋកម្មសង្គ្រាម ដែលជាការចោទប្រកាន់ត្រូវបានទីក្រុងមូស្គូបដិសេធ៕