(ហ្គាហ្សា)៖ ក្រុមគ្រូពេទ្យក្នុងតំបន់ហ្កាហ្សា បានឱ្យដឹងនៅថ្ងៃចន្ទនេះថា ការវាយប្រហារតាមអាកាសរបស់អ៉ីស្រាអែល ត្រូវចំផ្ទះ ៣ខ្នងនៅក្នុងទីក្រុង Rafah ភាគខាងត្បូង តំបន់ហ្កាហ្សា បានបណ្តាលឱ្យមនុស្ស ១៣នាក់ស្លាប់ និងរងរបួសជាច្រើននាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២៩ ខែមេសា ឆ្នាំ ២០២៤។

ប្រព័ន្ធផ្សព្វផ្សាយគ្រប់គ្រងដោយក្រុមហាម៉ាស ក៏បានឱ្យដឹងដែរថា អ្នកស្លាប់មានចំនួន ១៥នាក់។ បើតាមមន្ត្រីសុខាភិបាលតំបន់នៅឯទីក្រុងហ្កាហ្សា (Gaza City) ភាគខាងជើង យន្តហោះអ៉ីស្រាអែលបានវាយប្រហារលើផ្ទះ២ខ្នងបានសម្លាប់មនុស្ស និងរបួសជាច្រើននាក់ផងដែរ។

គួរបញ្ជាក់ថា ការវាយប្រហារតាមផ្លូវអាកាសលើទីក្រុង Rafah ដែមានមនុស្សជាង ១លាននាក់កំពុងជ្រកកោននោះ បានកើតឡើងប៉ុន្មានម៉ោងប៉ុណ្ណោះ មុនពេលប្រទេស អេហ្ស៉ីបធ្វើជាម្ចាស់ផ្ទះរៀបចំកិច្ចពិភាក្សារវាងមេដឹកនាំក្រុមហាម៉ាស អំពីលទ្ធភាពនៃកិច្ចព្រមព្រៀងបទឈប់បាញ់ជាមួយអ៉ីស្រាអែល។

មន្ត្រីជាន់ខ្ពស់មួយរូបរបស់ក្រុមហាម៉ាស់ បានប្រាប់ Reuters ថានឹងមានកិច្ចពិភាក្សានាថ្ងៃចន្ទ នៅក្នុងទីក្រុងគែរ រវាងគណៈប្រតិភូហាម៉ាស់ កាតា និងអ្នកសម្រុះសម្រួល អេហ្ស៉ីប ដើម្បីពិភាក្សាលើការឆ្លើយតបរបស់អ៉ីស្រាអែល ទៅនឹងសំណើររបស់ខ្លួន៕