(សៀមរាប)៖ លោកឧត្តមសេនីយ៍ទោ ហួត សុធី ត្រូវបានប្រកាសចូលកាន់តំណែងជា ស្នងការនគរបាលខេត្តសៀមរាប នៅព្រឹកថ្ងៃទី១៨ ខែមេសា ឆ្នាំ២០២៤នេះ ក្រោមអធិបតីភាព នាយឧត្តមសេនីយ៍ ស ថេត អគ្គស្នងការនគរបាលជាតិ និងអភិបាលខេត្តសៀមរាប លោក ប្រាក់ សោភ័ណ្ឌ និងប្រធានក្រុមប្រឹក្សាខេត្ត។

ក្នុងពិធីប្រកាសនេះ លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប បានធ្វើការប្ដេជ្ញាចិត្តដូចខាងក្រោម៖

*ទី១៖ ស្មោះត្រង់ចំពោះជាតិ សាសនា ព្រះមហាក្សត្រ ការពាររដ្ឋធម្មនុញ្ញ

*ទី២៖ ការពារដាច់ខាតរាជរដ្ឋាភិបាលស្របច្បាប់ ដែលប្រសូត្រចេញពីឆន្ទៈរាស្ត្រ និងចូលរួមអនុវត្តឲ្យសម្រេចបានជោគជ័យ នូវគ្រប់កម្មវិធីនយោបាយរបស់រាជរដ្ឋាភិបាល

*ទី៣៖ តម្កល់ផលប្រយោជន៍ជាតិជាធំ ចាត់ទុកប្រជាពលរដ្ឋជាគ្រួសារតែមួយ បម្រើពួកគាត់ ដោយភក្ដីភាព។ ទន្ទឹមនោះធានាឲ្យបាននូវសន្តិសុខ សុវត្ថិភាពជូនអ្នកវិនិយោគិននិងភ្ញៀវទេសចរ បរទេស ដែលមកវិនិយោគ ស្នាក់នៅ ប្រកបរបរ ធ្វើអាជីវកម្ម ឬធ្វើទេសចរកម្សាន្ដនៅក្នុងទឹកដី នៃខេត្តសៀមរាបនេះ តាមរយៈការរួមចំណែកអនុវត្តគោលនយោបាយជាតិស្តីពីទេសចរណ៍និងគោលនយោបាយជាតិស្តីពី <<ភូមិ ឃុំ-សង្កាត់មានសុវត្ថិភាព>> សំដៅលើកស្ទួយកិត្តិយស និងកិត្យានុភាពជាតិ

*ទី៤៖ គោរព និងអនុវត្តម៉ឺងម៉ាត់តាមច្បាប់ បទបញ្ញត្តិ បទបញ្ជា បទវិន័យនគរបាលជាតិកម្ពុជា និងគោលការណ៍នានារបស់ថ្នាក់ដឹកនាំគ្រប់ជាន់ថ្នាក់

*ទី៥៖ ដឹកនាំមន្ត្រីក្រោមឱវាទប្រកបដោយគុណធម៌ តម្លាភាព រក្សានិងបង្កើនចំណង សាមគ្គីភាពផ្ទៃក្នុងឲ្យបានរឹងមាំ រួមសុខរួមទុក្ខជាមួយគ្នាគ្រប់កាលៈទេសៈ។ ទន្ទឹមនឹងនោះ ខិតខំលើកកម្ពស់គុណភាពកងកម្លាំង ទាំងសមត្ថភាពជំនាញ វិន័យ សេចក្តីថ្លៃថ្នូ ប្រកបដោយ សីលធម៌វិជ្ជាជីវៈ

*ទី៦៖ តម្កល់ផលប្រយោជន៍អង្គភាពខ្ពស់ ដោយខិតខំបន្តកសាងបណ្តាអង្គភាពចំណុះស្នងការដ្ឋានឲ្យស័ក្កិសមជាបង្អែកផ្នែកសន្តិសុខយ៉ាងរឹងមាំសម្រាប់ប្រជាពលរដ្ឋ

*ទី៧៖ បង្កើនកិច្ចសហការជិតស្និទ្ធជាមួយអង្គភាពពាក់ព័ន្ធ ទាំងនៅក្នុងខេត្ត និងខេត្តជាប់ ព្រំប្រទល់ ដើម្បីរួមសហការគ្នាក្នុងការរក្សាការពារនូវសន្តិភាព សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម៕